የሮተሪ ኢንተርናሽናል የዲስትሪክት 1710 የፖሊዮ ፕላስ (PolioPlus) ልዑካን ቡድን በኢትዮጵያ የሕብረተሰብ ጤና ኢንስቲትዩት (EPHI) በመገኘት የሥራ ጉብኝት አድርጓል።

በሮታሪያን ዣን ፒሮን (Jean Piron) የተመራው ይህ ልዑክ፣ በኢትዮጵያ የሕብረተሰብ ጤና ኢንስቲትዩት ዋና ዳይሬክተር ዶ/ር መሳይ ኃይሉ እና በምክትል ዋና ዳይሬክተሩ ዶ/ር መልካሙ አብቴ ደማቅ አቀባበል ተደርጎለታል።

በውይይቱ ወቅት ዶ/ር መሳይ ኃይሉ፣ ኢትዮጵያ የፖሊዮ በሽታን ከሀገር ለማጥፋት ያላትን “የማይናወጥ ቁርጠኝነት” ለልዑካን ቡድኑ ገልጸዋል። ሮተሪ ኢንተርናሽናል ለፖሊዮ መከላከያ ዘመቻው እያደረገ ላለው የገንዘብ እና የቴክኒክ ድጋፍም ምስጋና አቅርበዋል።

በጉብኝቱ ላይ የሮተሪ የኢትዮጵያ ብሔራዊ የፖሊዮ ፕላስ ኮሚቴ (NPPC) ሰብሳቢ ወ/ሮ ትዕግሥት ይልማ ተገኝተው የነበረ ሲሆን፣ የዓለም አቀፉ ልዑክ ከሀገር ውስጥ የጤና ባለሙያዎች ጋር ያለውን ግንኙነት በማስተባበር ረገድ ከፍተኛ ሚና ተጫውተዋል።

ልዑካን ቡድኑ በተለያዩ የኢትዮጵያ ክፍሎች በመዘዋወር የፖሊዮ ክትባት ዘመቻው አፈጻጸምን ተመልክተዋል። በጉብኝታቸውም ኢትዮጵያ የፖሊዮ በሽታን ለማጥፋት እያከናወነች ያለውን ተግባር ያደነቁ ሲሆን፣ የጤና ባለሙያዎችንና የበጎ ፈቃደኞችን ተነሳሽነትም አድንቀዋል።

“በኢትዮጵያ የታየው የሥራ እንቅስቃሴ በጣም የሚያበረታታ ነው” ያሉት የልዑካን ቡድኑ አባላት፣ በሽታውን በሀገር ደረጃ ሙሉ በሙሉ ለማጥፋት የሚደረገውን ጥረት ሮተሪ በቀጣይም እንደሚደግፍ ቃል ገብተዋል።

የዘንድሮው የልዑካን ቡድን ጉብኝት “ፖሊዮን በጋራ እናጠፋለን” (Together we end polio) በሚለው መሪ ቃል የተመራ ሲሆን፣ በፈረንሳይና በቤልጂየም የሚገኙ የሮተሪ አባላትን ያካተተ ነው። ይህ ትብብር ወደ 17 ሚሊዮን የሚጠጉ የኢትዮጵያ ሕፃናትን ከፖሊዮ በሽታ ለመከላከል ለሚደረገው ጥረት ትልቅ አቅም እንደሚሆን ይጠበቃል።