በአርማወር ሐንሰን የምርምር ኢንስቲትዩት በክትባት ዲያግኖስቲክ እና የሜዲካል ዲቫይስ ምርምር እና ልማት ዳይሬክቶሬት በተዘጋጀው ብሔራዊ የመመርመሪያ ኪት ምርምርና ማበልጸግ ፍኖተ ካርታ ዙረያ ከሚመለከታቸው ባለድርሻ አካላት ጋር የምክክር መድረክ ተካሄደ፡፡

በመድረኩ ከተለያዩ ዩኒቨርስቲዎች ፣ ከመንግስት ተቆጣጣሪ ተቋማት ፣ ከአምራቾች ማህበራት፣ ከምርምር ተቋማት እንዲሁም ሌሎች የመንግሰት እና የግል ባለድርሻ አካላት የተሳተፉ ሲሆን ለተሳታፊዎችም የተዘጋጀው ፍኖተ ካርታ ቀርቦ ገለጻ ተደርጓል፡፡

የቴክኖሎጂ ሽግግር ፣ እንዴት ወደምርት መሸጋገር አለብን ፣ የተቆጣጠሪ አካላትን ሚና በተመለከተ የሚኖረውን የትብብር ስራ እና ከአጋር እና ባለድርሻ አካላት ጋር የሚሰሩ የትብብር ስራዎች ምን እንደሚመስሉ በአራት ዋና ዋና ክፍሎችን ያካተተ ነው፡፡ በቀረበው ገለጻ ላይም ከተሳፊዎች ሀሳብና አስተያየት ተሰብስቧል፡፡

ኢትዮጲያ ማምረት አለባት! ለጤናው ሴክተር የሚያስፈልጉ ግብአቶችን ኢትዮጲያ በሀገር አቅም ማምረት አለባት፡፡ ሀገራችን አምራች ብቻ ሳትሆን ወደፊት ሊከሰቱ ለሚችሉ የጤና ችግሮች በራስ አቅም መፍታት የምትችልበት የዕውቀትና የብቃት ደረጃ ላይ መድረስ አለባት ያሉት የአህሪ ዋና ዳይሬክተር ፕ/ር አፈወርቅ ካሱ ናቸው፡፡

ሰነዱ እንደ ሀገር ብዙ ነገሮችን ለማካተት ሞክሯል፤ ምን ጥንካሬና ድክመት እንዲሁም ምን አይነት ዕድልና ችግሮች ይገጥሙናል የሚለውን በተወሰነ መልኩ ያመላከተ ሲሆን ይህንን መሰረት አድርገን ለኢትዮጲያ ምን ያስፈልጋታል ፣እንዴት ነው ያንንስ ምንተገብረው የሚለውን ከሀሳብ ጀምሮ እስከ ምርት ያለውን ሂደት በምን መልኩ መሄድ እንዳለብን የሚያመላክት ሰነድ ነው ሲሉ በክትባት ዲያግኖስቲክ እና የሜዲካል ዲቫይስ ምርምር እና ልማት ዳይሬክተር የሆኑት ዶ/ር ደረጄ ንጉሴ ገልጸዋል፡፡