“የአፍሪካን የጤና ደህንነት እና የሉዓላዊነት አጀንዳ ማራመድ፡ ቁርጠኛ ፋይናንስ እና አመራርን በመጠቀም ዘላቂነትን ማረጋገጥ” በሚል መሪ ቃል የአፍሪካን የጤና ስርዓቶች በዘላቂ ፋይናንስ፣ ጠንካራ አመራር እና በራስ መተማመንን ለማረጋገጥ በተሻለ አህጉራዊ ትብብርን ማጠናከር ላይ ያተኮረ የጎንዪሽ ስብሰባ በአፍሪካ የበሽታ መቆጣጠሪያ እና መከላከያ ማዕከል( Africa CDC) እየተካሄደ ይገኛል።

በስብሰባው ላይ የመክፈቻ ንግግር ያደረጉት የኢፌድሪ የጤና ሚኒስትር እና በአፍሪካ የበሽታ መቆጣጠሪያ እና መከላከያ ማዕከል( Africa CDC) የቦርድ ም/ሰብሳቢ ዶ/ር መቅደስ ዳባ ዝግጅቱን “የአመራር ቁርጠኝነት ማሳያ” ሲሉ ገልጸውታል። ስብሰባው በአፍሪካ አገሮች መካከል ያለውን የጤና ደህንነት እና ሉዓላዊነት ለማሳደግ ያለንን የጋራ ቁርጠኝነት የሚያንፀባርቅ መሆኑን ተናግረዋል።

ዝግጅቱ የተጠናከረ አህጉራዊ ትብብር እና ዘላቂ ስርዓቶችን ለመገንባት ያለንን የጋራ ቁርጠኝነት ያሳያል ያሉት ዶ/ር መቅደስ፤ በውጭ አቅርቦት ሰንሰለቶች ላይ ጥገኝነትን ለመቀነስ እና አስፈላጊ መድሃኒቶችን እና ክትባቶችን ፍትሃዊ በሆነ መንገድ ማግኘትን ለማረጋገጥ ቁርጠኛ የፋይናንስ፣ የተጠያቂነት አመራር እና መድሀኒትን በራስ የማምረት አቅም ማስፋት አስፈላጊነት ላይ አፅንዖት ሰጥተዋል።

አፍሪካን ከወደፊት የጤና ድንገተኛ አደጋዎች ለመጠበቅ በአገር ውስጥ ሀብት ማሰባሰብ እና ተቋማዊ አቅም ግንባታ ላይ ኢንቨስት ማድረጉን መቀጠል እንዳለባትም አክለዋል።

የአፍሪካ የበሽታ መቆጣጠሪያ እና መከላከያ ማዕከል ዋና ዳይሬክተር ዶ/ር ዣን ካሴያ የበሽታ ክትትል፣ የአደጋ ጊዜ ዝግጁነት እና ፈጣን ምላሽ ስርዓቶችን ለማጠናከር የተቀናጀ አህጉራዊ እርምጃ አስፈላጊነትን አጉልተው ገልጸዋል።

በአፍሪካ ጠንካራ እና በራስ መተማመን ያለው የህብረተሰብ ጤና አርክቴክቸር ለመገንባት ዘላቂ የፋይናንስ ዘዴዎች ወሳኝ መሆናቸውን ተናግረዋል። ዶ/ር ካሴያ የጤና ደህንነት ከኢኮኖሚ ደህንነት የማይነጣጠል መሆኑን አፅንኦት ሰጥተው አባል ሀገራት ለህዝብ ጤና ኢንቨስትመንት ከፍተኛ የፖለቲካ ቁርጠኝነት እንዲኖራቸው ጥሪ አቅርበዋል።

የአፍሪካ ህብረት የልማት ኤጀንሲ-ኔፓድ ዋና ስራ አስፈፃሚ ዶ/ር ናርዶስ በቀለ-ቶማስ የአፍሪካን የጤና ሉዓላዊነት አጀንዳ ለማሳካት የስትራቴጂክ አጋርነቶች እና የልማት ፋይናንስ ሚና አፅንዖት ሰጥተዋል። የጤና ቅድሚያ የሚሰጣቸውን ነገሮች ከአህጉራዊ የልማት ማዕቀፎች ጋር ማመጣጠን ወደ ዘላቂ ስርዓቶች እድገትን እንደሚያፋጥን ተናግረዋል።

Website: moh.gov.et

Facebook: Ministry of Health,Ethiopia

Twitter: x.com/fmohealth

YouTube: youtube.com/@FMoHealthEthiopia

Tiktok: tiktok.com/@mohethiopia

Telegram: t.me/M0H_EThiopia

Linkedin: lnkd.in/ewFJ6VAB