ኢንስቲትዩቱ ከህብረተሰብ ጤና ላብራቶሪ እና ከዘርፈ ብዙ ኤች አይቪ ኤድስ መከላከልና መቆጣጠር ዳይሬክቶሬት ጋር በጋራ ለኤች አይቪ ቫይረስ ይበልጥ ተጋላጭ የሆኑ የህብረተሰብ ክፍሎች የቫይራል ሎድ መጠንን ለመቀነስ በሚያስችሉ ሁኔታዎች እና የላብራቶሪ አገልግሎት ጥራት ማሻሻያ ዜዴዎች ዙሪያ ከዘርፉ ባለሙያዎች ጋር መክሯል ።

አቶ አለማየሁ ጌታቸው የቢሮው ዘርፈ ብዙ የኤች አይቪ ኤድስ ዳይሬክቶሬት ዳይሬክተር የኤች አይቪ ኤድስ በሽታን የመከላከልና የመቆጣጠር ተግባሩን ከምንጊዜዉም በላይ ለማሳለጥ ለዜጎች ጥራት ያለው የላብራቶሪ አገልግሎት ተደራሽ ለማድረግ ሽፋኑን ማሳደግ ይገባል ብለዋል።

ወ/ሮ አይሻ ሽፋ የጤና ቢር የህብረተሰብ ጤና ኢንስቲትዩት ወስጥ የላብራቶሪ ከፍተኛ ባለሙያ የመነሻ ሰነድ ባቀረቡበት ወቅት እንደተናገሩት ኤች እይቪ ቫይረስን ጨምሮ ሌሎች ተላላፊ በሽታዎች ላይ የሚፈጠረውን የቫይረስ ጉዳት ለመቀነስ የላብራቶሪ የአሰራር ሂደቶችን ጥራት ማሻሻል እንደሚገባ ገልጸዋል ።

የላብራቶሪ ባለሙያዎች ሙያው የሚጠይቀውን የአሰራር ቅደም ተከተሎች በመጠበቅና ስራ ላይ በማዋል እንዲሁም ለተገልጋዮች እሴት በሚጨምር መልኩ የላብራቶሪ የጥራት ደረጃን በማሻሻል እና የናሙና የቅብብሎሽ ስርዓት ሽፋንን ማሳግደ ይገባል ብለዋል።

በላብራቶሪ ክፍል ውስጥ የሚከናወኑ እንደ ጂን ኤክስፐርት ማሽንን ለቫይረሱ ተጋላጭ የሆኑ የጨቅላ ህፃናት ምርመራ ላይ በትኩረት መስራት እና ኤች አይቪ ቫይረስ በደም ውስጥ በምን ያህል ደረጃ እንደሚገኝ መጠኑን ለመረዳት ጥራት ያለው የላብራቶሪ የአሰራር ሂደቶችን መከተል ይገባል ያሉት ወ/ሮ አይሻ የየተቋሙ የማኔጅመንት አካላት የስራውን ጫና በመረዳት ለዘርፉ ባለሙያዎች የተለያዩ የላብራቶሪ ግብአቶችን ጨምሮ ሌሎች ቁሳቁሶችን ድጋፍ ማድረግ ተገቢ መሆኑን አስገንዝበዋል ።

አቶ ሀብታሙ ሀይለ መስቀል የዘርፈ ብዙ ኤች አይቪ ኤድስ መከላከልና መቆጣጠር ዳይሬክቶሬት ውስጥ የሲዲሲ ፕሮጀክት አስተባባሪ በበኩላቸው ከዳታ ጋር ተያይዞ በላብራቶሪ ውስጥ የተገኙ ውጤቶችን የተገልጋዮችን ጥቅም መሰረት በማድርግ፣ በማደራጀት ፣ጥራቱን ማየትና ማረጋገጥ እንዲሁም ሌሎች አካላት በቀላሉ መረዳት እንዲችሉ መረጃን በተገቢው ማደራጀት ይገባል ብለዋል ።

በቀጣይ ያሉብንን ጉድለቶች በማረም ጥንካሬያችንን ደግሞ ይበልጥ በማጎልበት እቅድን መሰረት በማድረግ ርብርብ ማድረግ ተገቢ እንደሆነ አቶ ሀብታሙ አክለው ገልጸዋል።

የውይይቱ ተሳታፊዎች ከቫይራል ሎድ ጋር ተያይዞ በቀጣይ ስለሚሰሯቸዉ ስራዎች የአፈፃፀም ማሻሻያ እቅድ በቡድን በቡድን ሆነው ጥልቅ ዉይይት በማድረግ እቅድ ካቀዱ በኃላ የጋራ በማድርግ ውይይቱ ተጠናቋል ።

የማ/ ኢት/ክ/መ/ጤና ቢሮ